Policia polake ka arrestuar 10 persona, kryesisht adoleshentë, pas kërcënimeve për sulme ndaj shkollave, ndërsa vendi është përfshirë nga frika për ngjarje të tjera të dhunshme. Alarmimi vjen pas dy sulmeve me thikë në shkolla brenda pak ditësh dhe përhapjes së thashethemeve në rrjetet sociale për një të ashtuquajtur “Të Premte të Përgjakshme”, më 9 tetor.
Autoritetet kanë vënë në gatishmëri rreth 10 mijë shkolla, ndërsa u kanë bërë thirrje qytetarëve të mos përhapin informacione të pakonfirmuara që mund të shtojnë panikun ose të nxisin akte të tjera të dhunshme.
Në rrjetet sociale janë përhapur pretendime se sulmet e fundit mund të jenë pjesë e një sfide në internet. Megjithatë, policia deklaroi se deri më tani nuk ka gjetur prova që të mbështesin ekzistencën e një sfide të organizuar në shkallë kombëtare. Ministri polak i Çështjeve Dixhitale, Krzysztof Gawkowski, tha për televizionin TVN24 se në internet po qarkullojnë shumë informacione të rreme dhe reagime emocionale, të nxitura nga shqetësimi i publikut.
