Ndërsa në mediat kryesore europiane, protestat e flamingove i lidhin me ambjentalistët, me të gjelbrit europianë që kanë si shqetësim ruajtjen e natyrës, Partia Socialiste i sheh si terroristë dhe ektremistë të lidhur me Iranin. Kreu i grupit parlamentar të PS, Taulant Balla tha se katër policë ishin plagosur në protestën përballë kuvendit.
"Protesta nisi kundër dhunës. Sekretari i shtetit Marko Rubio një javë më parë në Konferencën Ndërkombëtare kundër Terrorizmit e theksoi shumë qartë se ka disa lëvizje të ekstremit që mund të rrezikojnë stabilitetin në Europë. Persona të identifikuar prej nesh, me lidhje të qarta me Gardën Revolucionare të Iranit janë orkestruesit kryesorë të akteve të dhunës. Solidariteti i turpshëm i një partie të përdhunuar nga ajo protestë... por ne kurrsesi nuk do të tolerojmë që të goditen punonjësit të policisë së shtetit. Gjaku i punonjësve të policisë së shtetit, është gjaku i vetë shtetit. Kush guxon të ngrejë dorën mbi punonjësit e policisë së shtetit, ka ngritur dorë kundër shtetit. thirrja imë nuk është për policinë, thirrja ime është për drejtësinë, edhe jetën e prokurorëve dhe gjyqtarëve e ruajnë punonjësit e policisë së shtetit" tha Balla.
Nga protesta e qytetarëve jashtë kuvendit janë hedhur vezë drejt makinave të deputetëve, por policia ka rrethuar kuvendit dhe ka larguar qytetarët duke bllokuar të gjithë zonën përreth.
