Harry Styles ka bërë një koment të papritur për martesën e ish-të dashurës së tij, Taylor Swift, me yllin e NFL-së, Travis Kelce.
Gjatë koncertit të tij të shtunën mbrëma në Madison Square Garden në New York, Styles i bëri një referencë të drejtpërdrejtë martesës së Swift dhe Kelce, e cila u zhvillua në të njëjtin ambient vetëm disa javë më parë.
“Jemi në Madison Square Garden, shtëpia e kampionëve të botës, New York Knicks”, tha Styles, 32 vjeç, në një video të filmuar nga fansat.
“Dhe këtu bëhen edhe dasma”, shtoi ai me një ton shakaje.
Komentet e tij vijnë pasi më herët ishte raportuar se këngëtari ishte ftuar në dasmën e Swift dhe Kelce më 3 korrik, por nuk kishte mundur të merrte pjesë për shkak të një koncerti në Londër.
E fejuara e Styles, aktorja Zoe Kravitz, ishte e pranishme në ceremoninë madhështore. Kravitz dhe Swift janë mike prej vitesh.
Styles dhe Swift kanë pasur një lidhje për disa muaj në fund të vitit 2012 dhe fillim të vitit 2013. Edhe pse kanë kaluar rreth 13 vite nga romanca e tyre shumë e komentuar, dyshja duket se sot ruan marrëdhënie miqësore.
Fakti që Swift e ftoi Styles në dasmën e saj me Kelce shihet gjithashtu si një shenjë se nuk ka mbetur ndonjë hatërmbetje mes tyre.
Dasma e Swift dhe Kelce në Madison Square Garden thuhet se mblodhi rreth 1,000 të ftuar, mes tyre miq të afërt, yje të Hollywood-it dhe figura të njohura të sportit e muzikës.
Aktori Adam Scott, i cili ishte i pranishëm në ceremoni me bashkëshorten e tij Naomi, e përshkroi dasmën si një event madhështor, por njëkohësisht shumë emocional.
“Ndjesia që morëm ishte se ishte një dasmë e vërtetë. Kishe përshtypjen se këta janë thjesht dy njerëz që e duan njëri-tjetrin”, tregoi ai.
Scott shtoi se, pavarësisht përmasave të mëdha të ceremonisë dhe numrit të jashtëzakonshëm të të ftuarve, në thelb ajo ndihej si “një dasmë normale me dy njerëz që bashkoheshin”.
Ndërkohë, Travis Kelce e ka përshkruar martesën me Swift si “natën më të mirë të jetës së tij”, duke e cilësuar ceremoninë si një natë të jashtëzakonshme dhe plot festime.
