Ndarja e re me 15 bashki më pak pritet të jetë përplasja kryesore e seancës së sotme plenare. Projektligji që redukton numrin e bashkive nga 61 në 46 kërkon 84 vota për t’u miratuar, por shumica nuk i ka ende të sigurta të gjitha votat. Përveç kundërshtimit të opozitës, rezervat kanë ardhur edhe nga brenda Partisë Socialiste. Erion Braçe dhe Vullnet Sinaj janë shprehur kundër ndarjes së re, duke e bërë aritmetikën e votimit më të ndërlikuar për mazhorancën. Në sallë pritet të jenë edhe kryeministri Edi Rama dhe Belinda Balluku, të cilët kanë munguar në disa prej seancave të fundit.
Debati për hartën territoriale pritet të shoqërohet edhe me tension politik jashtë Kuvendit. Opozita ka paralajmëruar protesta brenda dhe jashtë sallës, ndërsa në të njëjtën orë, 10:00, është thirrur edhe protesta e flamingove.
Seanca pritet të jetë e gjatë edhe për shkak të katër interpelancave. PD ka thirrur ministrin e Brendshëm, Ervin Demo, për reagimin e policisë ndaj protestuesve. Ministri i Infrastrukturës, Enea Karakaçi, do të përballet me pyetje për autostradën Milot–Balldre dhe TEC-et lundruese në Vlorë, ndërsa ministri i Financave, Petrit Malaj, është thirrur për çmimet e produkteve bazë dhe fuqinë blerëse. Në rend dite janë edhe tetë projektligje të tjera, si dhe kërkesa për ngritjen e një komisioni hetimor parlamentar për veprimtarinë e shoqërisë shtetërore “KAYO”.
