Aktorja e njohur Helen Mirren ka reaguar publikisht pas raportimeve për një konflikt të mundshëm me kolegun e saj Tom Hardy gjatë xhirimeve të serialit “MobLand”.
Në një postim në Instagram, Mirren publikoi një foto të Hardy-t, të shoqëruar me një mesazh të shkurtër, por të qartë: “Të dua tani dhe gjithmonë”.
Ky reagim vjen pasi mediat ndërkombëtare raportuan se mes dy aktorëve kishte pasur tensione në set, ku Mirren dyshohej se ishte e pakënaqur me sjelljen dhe profesionalizmin e Hardy-t gjatë xhirimeve.
Sipas burimeve, aktori britanik është akuzuar për vonesa në set dhe për ndryshime të shpeshta në dialog, çka dyshohet se ka shkaktuar pakënaqësi mes stafit dhe kolegëve.
Madje, disa raportime pretendonin se Hardy ishte larguar nga projekti për shkak të këtyre përplasjeve, ndonëse më vonë u raportua se ai nuk është shkarkuar zyrtarisht dhe se situata po tentohet të rregullohet nga produksioni.
Pavarësisht thashethemeve, postimi i Mirren është interpretuar si një sinjal pajtimi dhe respekti ndaj bashkëpunëtorit të saj, duke zbutur zërat për një konflikt mes tyre në xhirime.
