Irani ka bërë të ditur se ka arritur një marrëveshje me Omanin për krijimin e një rruge të përkohshme të transportit detar nëpër Ngushticën e Hormuzit, një nga korridoret më të rëndësishme energjetike në botë. Zëdhënësi i Ministrisë së Jashtme iraniane, Esmaeil Baqaei, deklaroi se marrëveshja ndodhet në fazat përfundimtare, por nuk dha detaje mbi mënyrën se si do të funksionojë. Ai theksoi se, pavarësisht dakordësisë me Omanin për koordinatat gjeografike të rrugës, siguria e lundrimit nuk mund të garantohet për shkak të pranisë ushtarake amerikane dhe bllokadës detare ndaj porteve iraniane.
Sipas Teheranit, faktorët që e bëjnë Ngushticën e Hormuzit të pasigurt lidhen me veprimet e SHBA-së në rajon. Deri më tani, as Uashingtoni dhe as Omani nuk kanë komentuar zyrtarisht mbi njoftimin.
Ndërkohë, zëvendësministri i Jashtëm iranian, Kazem Gharibabadi, tha se korridori i ri detar do të ishte i përkohshëm dhe mund të mbetet në funksion nga dy deri në katër muaj.
Ngushtica e Hormuzit ka qenë në qendër të tensioneve që prej sulmeve amerikane dhe izraelite ndaj Iranit në muajin shkurt. Teherani ka kufizuar ndjeshëm qarkullimin detar në këtë rrugë strategjike, përmes së cilës kalon rreth 20% e tregtisë globale të naftës dhe gazit natyror të lëngshëm (LNG).
Presidenti amerikan Donald Trump paralajmëroi të martën se Irani do të “goditet shumë rëndë” nëse ngushtica nuk rihapet “shumë shpejt”. Megjithatë, Irani këmbëngul se nuk është duke zhvilluar negociata me SHBA-në dhe nuk planifikon ta bëjë këtë.
Një nga çështjet më të debatueshme mbetet kërkesa e Iranit për vendosjen e tarifave ndaj anijeve që kalojnë nëpër Ngushticën e Hormuzit. Sipas burimeve të cituara nga Reuters, Teherani kërkon tarifa nga 5% deri në 7% të vlerës së ngarkesës, ndërsa Omani ka propozuar një tarifë rreth 3%. Shtetet e Bashkuara kundërshtojnë çdo tarifim.
Lajmi për përparimin drejt një marrëveshjeje ndikoi menjëherë në tregjet ndërkombëtare, ku çmimi i naftës Brent ra me 0.3%, duke u tregtuar në 79.24 dollarë për fuçi gjatë sesionit aziatik të së enjtes.
