Agjencia Shtetërore e Kadastrës vijon punën në terren për evidentimin dhe trajtimin e banesave pa dokumentacion pronësie, nga shtëpitë e vjetra të ndërtuara para vitit 1991, te banesat informale. Aktualisht po punohet me grupe të dedikuara në fshatrat e Bashkisë Himarë. Për të ndjekur nga afër procesin ka qenë në tërren drejtoresha e përgjithshme e ASHK-së, Lorena Goxhobelli.
“Ky proces është edhe për ndërtesat pas vitit ’91 edhe për shtëpitë e vjetra. Ne aktualisht po punojmë në 9 fshatrat e parë, duke filluar me Palasën e do të punojmë për të përmbyllur gjithë fshatrat e tjerë”, tha Goxhobelli gjatë një bashkëbisedimi me banorë të Dhërmiut.
Përgjatë këtyre ditëve të parë në Himarë, specialistët e ASHK-së kanë evidentuar 235 banesa me mangësi në dokumentacionin e pronësisë.
Ndërkohë në periudhën janar-gusht 2026, ASHK ka emetuar rreth 26 mijë vendime legalizimi në të gjithë vendin për objektet para vitit '91. Kjo shifër është afërsisht sa totali i vitit 2025 dhe më shumë sesa totali i vitit 2023 dhe 2024 të marrë së bashku (përkatësisht 11 000 dhe 10 800 vendime)
Në Bashkinë Himarë, ekipet e ASHK do të jenë në dispozicion të banorëve deri më 25 nëntor, sipas një kalendari të publikuar më herët dhe do të shkojnë derë më derë. Qasja e re e ASHK synon të ndryshojë edhe marrëdhënien mes qytetarit dhe institucionit. Në vend që qytetarët të jetë gjithmonë ata që duhet të udhëtojnë drejt zyrave dhe të ndjekin procedurat, ekipet e institucionit shkojnë në territor për të identifikuar dhe trajtuar problematikat nga afër. Kjo është një përpjekje për ta bërë shërbimin kadastral më të aksesueshëm, më pranë qytetarit dhe më të orientuar drejt zgjidhjes konkrete të problemeve të pronësisë.
Banorët e zonave të përfshira në kalendar ftohen të informohen për datat e prezencës së ekipeve dhe të përfitojnë nga kontakti i drejtpërdrejtë me specialistët e ASHK, për të trajtuar problematikat që lidhen me dokumentacionin e banesave të tyre.
