Aktori i njohur i serialit “Euphoria”, Jacob Elordi, do të rrëfejë versionin audio të librit autobiografik të kolegut të tij të ndjerë, Eric Dane. Vepra, e titulluar “My Book of Days: A Memoir in Moments”, pritet të publikohet më 3 nëntor dhe do të zbulojë anë të panjohura të jetës së aktorit, nga sfidat personale te përballja me sëmundjen e rëndë.
Jacob Elordi do t’i japë zë kujtimeve të Eric Dane në një projekt që merr një domethënie të veçantë pas ndarjes nga jeta të aktorit amerikan. Dy artistët luajtën së bashku në serialin e njohur “Euphoria”, ku Elordi interpretoi Nate Jacobs, ndërsa Dane portretizoi babanë e tij, Cal Jacobs.
Sipas informacioneve të konfirmuara nga shtëpia botuese Penguin Random House për revistën “Entertainment Weekly”, Elordi do të jetë rrëfimtari kryesor i versionit audio të librit. Gazetarja Maria Shriver do të interpretojë kapitullin hyrës, të titulluar “Dear Reader”, të cilin e ka shkruar vetë.
Libri “My Book of Days: A Memoir in Moments” do të publikohet pas vdekjes së Dane, më 3 nëntor 2026. Në të, aktori rikthehet te momentet që kanë formësuar jetën e tij, karriera në Hollywood, betejat personale dhe rëndësia e familjes.
Eric Dane, i njohur gjerësisht edhe për rolin e Dr. Mark Sloan në serialin “Grey’s Anatomy”, bëri të ditur në prill të vitit 2025 se ishte diagnostikuar me sklerozë laterale amiotrofike (ALS), një sëmundje progresive neurodegjenerative që prek qelizat nervore përgjegjëse për kontrollin e muskujve.
Aktori u nda nga jeta në shkurt të vitit 2026, në moshën 53-vjeçare.
Në kujtimet e tij, Dane trajton edhe vështirësitë me varësinë, përvojat që e kanë shoqëruar gjatë karrierës dhe mënyrën se si diagnoza ndryshoi këndvështrimin e tij mbi jetën dhe kohën. Një vend të veçantë zënë gjithashtu vajzat e tij, për të cilat dëshironte të linte një trashëgimi personale përmes historisë së vet.
Pavarësisht gjendjes shëndetësore, Dane u rikthye në xhirimet e “Euphoria” vetëm pak ditë pas njoftimit të diagnozës dhe u shfaq në dy episode të serialit.
