Kantautori dhe një prej emrave më të njohur të muzikës së lehtë shqiptare, Luan Zhegu, është vlerësuar nga Radio Televizioni Shqiptar me çmimin e veçantë “Pranverë e përhershme”, në kuadër të Festivalit të Pranverës.
Çmimi iu dorëzua gjatë ceremonisë, ku prezantuesit Bleona Qereti dhe Nik Xhelilaj ftuan maestro Zhani Ciko për dorëzimin e trofeut.
Në fjalimin e tij, Ciko theksoi kontributin e Zhegut në muzikën shqiptare, duke e cilësuar si një figurë të rëndësishme të kantautorëve të brezit të tij.
“Jemi në shtëpinë tonë në këtë Festival, në shtëpinë e muzikës. Për mua është një ngjarje e veçantë që një personalitet, kantautor si Luan Zhegu, i cili përshkruhet në këngët e tij me tematika të pasura merr këtë çmim”, u shpreh Ciko gjatë ceremonisë.
Ai solli në vëmendje edhe një nga periudhat e rëndësishme të karrierës së Zhegut, vitin 1997, kur kënga “Fal”, e kompozuar prej tij dhe e interpretuar nga Ledina Çelo, u vlerësua me çmimin e parë në festival.
"Vendi ishte në situata të vështira në ato kohë. Bëmë koncertin dhe kënga ‘Fal’ ishte apel për të urtuar dhe sensibilizuar njerëzit duke pasur parasysh situatën. Ndihem i vlerësuar që i dorëzoj Luanit këtë çmim” shtoi maestro Ciko.
I emocionuar pas vlerësimit, Luan Zhegu falënderoi publikun dhe organizatorët, duke theksuar lidhjen e gjatë me dëgjuesit ndër vite.
“Ky çmim i dedikohet publikut tim të mrekullueshëm që ka rreth 60 vite që bashkë-ecën me mua. Falënderoj stafin e festivalit dhe RTSH-në këtë emblemë të artit shqiptar për këtë vlerësim që më bëri”, u shpreh artisti.
