Madonna, e njohur si “Mbretëresha e Pop-it”, ka rikthyer vëmendjen me një projekt të ri artistik. Një ditë pas koncertit surprizë në Times Square në Nju Jork, këngëtarja u shfaq në Tribeca Festival më 5 qershor, ku prezantoi një film të shkurtër që shoqëron albumin e saj të ardhshëm “Confessions II”.
Filmi, i realizuar nga duoja TORSO (David Tori dhe Solomon Chase), e paraqet Madonna-n në një “udhëtim përtej realitetit” gjatë një nate të çmendur, me skena provokuese dhe me mesazhe simbolike.
Në klip përfshihen fragmente nga gjashtë këngët e para të albumit, mes tyre “I Feel So Free”, “Bring Your Love”, “Good for the Soul”, “One Step Away”, “Danceteria” dhe “Read My Lips”.
Në film, 67-vjeçarja shfaqet në situata të ndryshme: nga një apartament ku i ndërpritet papritur privatësia, deri te skena me drita lazer dhe festa në klub nate. Në projekt shfaqen edhe cameo nga Julia Garner, Sabrina Carpenter, Kate Moss, Benedict Cumberbatch dhe të tjerë.
Në një moment, shfaqet edhe vajza e saj Lourdes Leon, ndërsa filmi përfundon me një skenë ku ajo thotë: “Cut, bitch”.
Pas shfaqjes, Madonna dhe regjisorët diskutuan në Beacon Theatre me Anderson Cooper, duke folur për albumin, karrierën dhe ndikimin e saj në kulturën pop.
Ajo gjithashtu foli për koncertin surprizë në Times Square, i cili mblodhi rreth 50,000 fansa, si dhe për rëndësinë e lidhjes me publikun. Në fund, ajo i inkurajoi njerëzit “të marrin rreziqe, të jenë kuriozë dhe të vendosin telefonat poshtë për të u lidhur me njëri-tjetrin”.
Albumi “Confessions II” do të publikohet më 3 korrik, ndërsa filmi do të transmetohet në YouTube më 8 qershor.
