Fatos Lubonja deklaroi se kryeministri Edi Rama nuk ka reflektuar aspak nga protestat që vijojnë kundër qeverisë së tij, duke e lidhur këtë edhe me vendimin e fundit për të dhënë 4 milionë euro për koncertin e Kanye West.
Në një intervistë për News24, ai deklaroi se kryeministri ka shkelur Kushtetutën duke marrë këto para nga fondi rezervë. Sipas tij, kryeministri rrezikon të vendosë dhunë apo ta çojë vendin në dhunë, duke shtuar se duhet të jetë parlamenti dhe drejtësia që duhet ta frenojnë.
“Në gjithë këtë protestë, ku duhet të jetë i paktën i kujdesshëm shkel kushtetutën duke dhënë nga fondi rezervë 4 milionë për një koncert. Nuk ka mësuar asnjë gjë nga protesta. Çfarë deputetësh dhe ministrash janë ata? Me ligj apo me kode nderi e turpi që i manipulojnë njerëzit.
Me këtë akt tregon se nuk është një demokraci që vendos populli, por një autokrat që i jep 4 milionë euro një kompanie private siç po bën me Shqipërinë dhe nuk ka mësuar gjë nga kjo protestë. Ose do të vendosë dhunën ose do ta çojë popullin në dhunë dhe këtë duhet ta frenojnë të tjerët, parlamenti, opozita dhe drejtësia. Kjo është një çështje që drejtësia duhet të kishte nisur hetim”, deklaroi Lubonja.
