Ka shkaktuar reagime të shumta në rrjet një video e Florika Ngucaj që në praninë e kryetares së bashkisë së Lushnjës Eriselda Sefa kishte recituar një poezi për Enver Hoxhën në një aktivitet të organizuar në bibliotekën e këtij qyteti.
Videon e shpërndau edhe deputeti i PD-së, Saimir Korreshi që e konsideroi ngjarjen skandaloze.
“Në ambientet e Bibliotekës, brenda godinës së Muzeut të qytetit, i cili administrohet nga Bashkia Lushnjë – glorifikohet diktatori, i këndohet dhe duartrokitet. Kjo ne prani të kryetares së Bashkisë, e cila ka marrë dhe fjalën. Një turp i madh, një skandal Bashkiak!!” – shkroi Korreshi.
Nuk ka vonuar dhe kryetarja e Bashkisë së Lushnjës Eriselda Sefa ka bërë një reagim duke publikuar një video më të plotë pasi sipas saj pamjet e publikuara nga Koreshi ishin të paplota dhe të nxjerra nga konteksti.
“Deputeti lushnjar i opozitës Z.Saimir Korreshi publikoi një fragment nga ky aktivitet në fjalën e mbajtur nga vajza e z.Neki Ngucaj, ku ishte nxjerrë nga konteksti një recitim i saj që i referohej një kujtimi të hidhur të kësaj familje të persekutuar në periudhën komuniste, një metafore që sillte në vëmendje metodat indoktrinuese të fëmijëve në diktaturë!
Video e plotë bashkëngjitur këtij reagimi, tregon sesa dashakeq duhet të jesh që të shkëpusesh një fragment nga një aktivitet I rëndësishëm, për të marrë medemek kredite në opinionin publik. Në fakt duke pasur këtë ego të frikshme për vëmendje publike, mund të bëhesh edhe qesharak, sikurse në rastin aktual” – shkroi Sefa.
Deputeti i PD-së ka reaguar sërish duke kujtuar se ka një sërë rezolutash që ndalojnë që në institucione publike të recitosh për Diktatorin dhe Komunizmin.
“Paska folur dhe Kryetarja jo me jo. Mediat e Qivirri-Bishki qenkan sulur sikur paskam qenë unë i pari dhe e paskam bërë jashtë konteksti për kredo politike. Possiiiii.
Sa Turp. Cilado media qe nuk i gjen dot publikimet jau jap unë. Qëndrimi im është dhe i palëkundur të jesh i përndjekur nuk të jep të drejtën të recitosh në institucionet shtetërore. Pikëëë
Përfaqësuesit e institucionit qe janë prezent nuk duhet ta lejojnë pavarësisht çfare quajnë ata konteksttt. Është e ndaluar oooo Kryetare!!” – shkruan deputeti i PD. ©LAPSI.al
