Një qytetare që mori fjalën gjatë protestës së 36-të para Kryeministrisë bëri thirrje që lëvizja qytetare të organizohet politikisht, duke propozuar krijimin e një poli të tretë si alternativë ndaj klasës aktuale politike.
Në fjalën e saj, ajo tha se protestat duhet të shndërrohen në një forcë politike, duke argumentuar se kjo është mënyra më e shpejtë për të sjellë ndryshim. Ajo u bëri thirrje intelektualëve të mos qëndrojnë indiferentë dhe të angazhohen në këtë proces.
Pas përfundimit të tubimit, protestuesit marshuan në rrugët e Tiranës me flamuj kombëtarë dhe pankarta, duke kërkuar dorëheqjen e kryeministrit Edi Rama dhe largimin e qeverisë. Gjatë marshimit u dëgjuan vazhdimisht thirrje "Rama, jep dorëheqjen!", ndërsa organizatorët deklaruan se mobilizimi do të vijojë edhe në ditët në vazhdim.
