Kuvendi mblidhet sot në seancë plenare, me një axhendë të ngjeshur që përfshin disa interpelanca me ministra dhe votimin e një sërë projektligjesh. Seanca nis me miratimin e procesverbalit të 8 shtatorit dhe njoftimet, ndërsa më pas vëmendja kalon te interpelancat e kërkuara nga deputetët e Partisë Demokratike.
Në sallë pritet të paraqiten ministri i Mjedisit, Sofjan Jaupaj, ministri i Brendshëm, ministrja e Arsimit, Mirela Kumbaro, si dhe ministrja e Shëndetësisë dhe Mirëqenies Sociale, Klodiana Spahiu. Një tjetër interpelancë është kërkuar me ministrin e Infrastrukturës dhe Energjisë, Enea Karakaçi. Një nga pikat më të debatueshme të rendit të ditës pritet të jetë projektligji për ndryshimet në statusin e gjyqtarëve dhe prokurorëve. Nisma vjen në një kohë kur çështja e pagave të magjistratëve ka krijuar përplasje mes qeverisë dhe gjyqësorit.
Deputetët do të shqyrtojnë gjithashtu konventën për krijimin e Komisionit Ndërkombëtar të Kërkesave për Ukrainën, si edhe Konventën e Këshillit të Europës për Inteligjencën Artificiale, të drejtat e njeriut, demokracinë dhe shtetin e së drejtës. Në rendin e ditës janë edhe ndryshime që lidhen me sektorin e ullirit, disenjot dhe kontrollin e shoqërive me ofertë publike.
