Randal Kolo Muani i është përgjigjur teknikut Luciano Spalletti, i cili e kishte ngacmuar për mungesën e golave në dy ndeshjet e para të sezonit: “Ka të drejtë. Kur krijojmë shumë mundësi, duhet të jemi gjithashtu të aftë t’i konkretizojmë ato. Dhe pas asaj ndeshjeje, unë i pari e dija se kisha pasur rastet e duhura”.
Rastet që tani do t’i duhet t’i ndajë me Woltemade: “Mund të luajmë së bashku, nuk do të ishte aspak problem. Unë mund të luaj si sulmues qendre, si numër 10 dhe gjithashtu në krah. Është një koncept banal, por objektivi im është të jap kontribut”.
Pavarësisht thatësirës së golave në ndeshjet e para zyrtare, ish-lojtari i PSG-së qetëson situatën: “Unë jam një nga ata që e harrojnë menjëherë gabimin. Duhet të jesh i përqendruar dhe të mendosh për të tashmen. Nuk jam i shqetësuar që ende nuk kam shënuar. Fryma e grupit është shumë e mirë, skuadra luan mirë dhe krijon raste, golat do të vijnë”.
Sulmuesi francez, në një intervistë për “Corriere della Sera”, shpjegon edhe arsyen pse e dëshironte me kaq forcë rikthimin në Torino: “Përvoja e parë këtu kishte qenë shumë e bukur, nga shokët e skuadrës te stafi dhe tifozët. Doja ta përfundoja punën që kisha nisur: ta riktheja Juventusin në majë”. Edhe falë teknikut Spalletti: “Më pëlqen shumë, ai synon të ofrojë shumë zgjidhje”.
Duke nisur nga supersfida ndaj Milan: “Do të jetë një test shumë i rëndësishëm, edhe Milan është një skuadër e madhe dhe ne duhet të jemi gati”.
