Presidenti Donald Trump ndodhet në Bazën e Përbashkët Andrews, ku është zbuluar avioni i ri presidencial. Bëhet fjalë për një avion luksoz i dhuruar nga qeveria e Katarit, i cili mban në fasadë ngjyrat e kuqe, e bardhë dhe blu, si dhe mbishkrimin “Shtetet e Bashkuara të Amerikës”.
Avioni synon të shërbejë si zgjidhje e përkohshme mes dy avionëve të modifikuar Boeing 747-200, që përdoren si Air Force One që prej vitit 1990, dhe dy avionëve të rinj që kompania Boeing po modifikon, por që nuk pritet të jenë gati edhe për rreth dy vite të tjera.
Forcat Ajrore të SHBA-së njoftuan të premten se avioni i ri do të nisë së shpejti fluturimet testuese për modifikimet e kryera në avion. Siguria dhe mbrojtja janë prioriteti ynë më i lartë, tha Sekretari i Forcave Ajrore, Troy Meink.
“Që në fillim, ne vlerësuam me kujdes çdo kërkesë për të përshpejtuar dorëzimin, duke ruajtur standardet e larta që kërkon misioni presidencial. Ky projekt dëshmon se Forcat Ajrore të SHBA-ve mund të veprojnë shpejt pa sakrifikuar cilësinë, sigurinë apo besueshmërinë.”
Trump është shprehur i pakënaqur me vonesat në prodhimin e avionëve të rinj Air Force One, të cilët me shumë gjasa nuk do të përfundojnë përpara se mandati i tij të përfundojë në vitin 2029.
