Gjykata e Lartë pritet të shqyrtojë sot rekursin e kryebashkiakut të Tiranës, Erion Veliaj, i cili kërkon zbutjen e masës së sigurisë “arrest në burg” dhe zëvendësimin e saj me një masë më të butë. Seanca vjen në një moment kur ndryshimet e fundit në praktikën e Gjykatës së Lartë për masat e sigurisë kanë rihapur debatin mbi përdorimin e “arrestit në burg” si masë e zakonshme. Vendimet e fundit kanë theksuar se izolimi në qeli duhet të jetë alternativë e fundit, pas shqyrtimit real të masave të tjera.
Çështja Veliaj po ndiqet me vëmendje edhe në aspektin politik për shkak të ndikimit të mundshëm që vendimi mund të ketë në zhvillimet në Bashkinë e Tiranës dhe më gjerë në ekuilibrat e mazhorancës. Edhe në rast zbutjeje të masës, një vendim si “arrest në shtëpi” do të kufizonte ndjeshëm ushtrimin e detyrës, ndërsa rikthimi i plotë në funksion do të varej nga një masë edhe më e lehtë si “detyrim paraqitjeje”.
Vendimi i Gjykatës së Lartë pritet të ketë peshë jo vetëm procedurale, por edhe si sinjal mbi raportin e ri mes drejtësisë dhe politikës.
