Gjykata e Tiranës ka cakuar masën e sigurisë "arrest me burg" për 40-vjeçarin Ngushëllim Manzin, i cili dy ditë më parë vrau me armë zjarri vëllezërit Selam dhe Nazmi Islamaj. Ai la të plagosur edhe vëllain tjetër të tyre, Shefqet Islamaj. Ngjarja ndodhi në Kamëz pas një konflikti për motive të dobëta, për rrugëkalimin e një betoniereje, e cila do të kryente punime në banesën e vëllezërve Islamaj.
Bëhet me dije se gjatë dëshmisë së dhënë ai është shprehur i penduar për krimin, ndërsa në gjykatë nuk ka folur për shkak të tronditjes psikologjike. Përmes avokatit të tij mbrojës, autori ka deklaruar se vrasja ka ardhur pasi tre vëllezërit Islamaj kanë dhunuar me sende të forta dhe leva atë, motrën dhe nënën. Më pas ka marrë armën dhe ka qëlluar në kushtet e tronditjes së rëndë psikike.
