Pësoi tre gola në dy ndeshje, por Partizani e provoi deri në fund të gjente atë kualifikim në raundin e dytë të Europa League. Kushtet ishin kundër të kuqve, situata në klub nuk e favorizuan, zhvillimet ndodhën në kohë vonesë, por sërish kryeqytetasit nuk është se bënë keq (përsa i përket lojës) kundër Maribor. Meqë jemi tek kundërshtari, edhe shorti ishte në disfavor të tyre, kur e vendosi përballë rivalit më të vështirë ndër gjithë ato që gjetën skuadrat shqiptare në raundin e parë të kompeticionit.
Tekniku, Skënder Gega, nuk kishte jo vetëm lojtarë të kërkuar prej tij në dispozicion, por edhe koha ishte e limituar, ndoshta shumë e vogël për një teknik të aplikonte idetë e tij. E megjithatë, në një lojë të luajtur me dinjitet, fatet e ndeshjes u vendosën në një moment gabimi të Belicës (të kondicionuar edhe nga dëmtimi muskular), kur u shënua goli në Selamn Stërmasi, në ndeshjen e parë. Pastaj të kërkoje të mundje Maribor, madje me dy gola në Slloveni, ishte gati e pamundur, për një skuadër në pozitat e të kuqve.
E megjithatë me pak fat mund edhe të ishin vënë në vështirësi sllovenët, dy herë të shpëtuar nga traversë, me rezultatin 0-0 në goditjen e Atandës dhe në minutën e 70 në tentativën e Abdurahimit, që mund të barazonte rezultatin në 1-1. Të dyja mundësitë u mohuan për tu futur në lojë, apo për të ndërtuar një strategji më të përshtatshme, ndërsa golat e Dervisevic dhe Tavares në shtesë mbyllën llogarinë për Partizanin që në raundin e parë.
Gjërat ishin të ditura për sa kohë luhatjet e frikshme të një viti më parë, Partizani i kishte po me këta lojtarë e nëse nuk ndërhyhet në merkato edhe në kampionat problemet do të evidentohen...Gega nuk është se ka shkopin magjik!
