Borussia Dortmund, pasi siguroi fitoren e çmuar në Champions League në fushën e Sabah, u largua me nxitim nga stadiumi në Azerbajxhan. Ndërsa trajneri Kovač merrte pjesë në konferencat e zakonshme për shtyp dhe disa prej protagonistëve verdhezinj po i nënshtroheshin testeve antidoping, pjesa më e madhe e skuadrës u kthye në hotel. Nuk bëhej fjalë për arsye të rendit publik, por për një nevojë higjienike: të bënin dush. Gjermanët nuk dëshironin të laheshin në dhomat e zhveshjes të rezervuara për ekipet mike në stadium, për të shmangur rreziqet shëndetësore.
Një histori kurioze, e cila në të vërtetë vjen pas asaj që kishte ndodhur edhe në ditët e mëparshme. Borussia, pasi u njoh me stadiumin olimpik në Baku, kishte preferuar të freskohej në hotel edhe pas stërvitjes përfundimtare. Trajneri Kovač e konfirmoi gjithçka në konferencën për shtyp pas fitores 2-1 ndaj Sabah: “Nuk pati asnjë të papritur. Nuk ishim larë këtu në stadium as dje, pas stërvitjes përfundimtare. Na ishte rekomanduar të mos përdornim dushet e stadiumit, por të bënim dush në hotel. Prandaj u nxituam të ktheheshim”.
Por çfarë kishte të pazakontë në dushet e dhomave të zhveshjes në Azerbajxhan? Drejtori sportiv i Dortmund, Nils-Ole Book, e justifikoi zgjedhjen kështu: “Besoj se dushet e hotelit ishin pak më mikpritëse. Për këtë arsye, u përpoqëm t’i kthenim lojtarët sa më shpejt të ishte e mundur”. I pyetur më tej, ai sqaroi: “Më mikpritëse… mund ta imagjinoni vetë. Zona e dusheve këtu nuk është tamam kulmi i elegancës”.
Në të vërtetë, nuk kishte asnjë defekt të dukshëm: instalimet dukeshin në pamje të parë në rregull dhe të mirëmbajtura, pra në përputhje me prestigjin e aktivitetit që po zhvillohej aty. Sipas Bild, ajo që e shqetësoi Borussia Dortmund ishte frika se në dushe mund të ishte i pranishëm bakteri i legionelës. Ky rrezik shfaqet kur uji nuk arrin të qarkullojë normalisht dhe lirshëm nëpër tubacione, duke krijuar mundësinë që bakteret të thithen lehtësisht përmes pikave të imëta të ujit të shpërndara në ajër.
Prandaj, ishte më mirë të ktheheshin në hotel, ku ambientet ofronin garanci më të mëdha. Atje, BVB-ja mundi të përfitonte edhe nga trajtimet e parashikuara në zonën e spa-së, për t’u rikuperuar në mënyrën më të mirë. Një detaj që nuk duhet nënvlerësuar, duke qenë se edhe Napoli do të luajë në të njëjtin stadium. Megjithatë, ka edhe nga ata që nuk e besojnë këtë version. Futbollisti i Sabah, Joy-Lance Mickels, ka dashur të kundërshtojë pretendimet e rivalëve: “Nuk e di cili është problemi dhe nuk dua të bëj insinuata për BVB-në. Ne kemi bërë dush aty pikërisht javën e kaluar, përpara ndeshjes kundër Slavia Pragës. Dushet janë të përsosura dhe nuk mungon as uji i ngrohtë”.
