Netflix po përballet me kritika të shumta në rrjetet sociale përpara publikimit të dokumentarit të ri mbi gjyqin e Michael Jackson, i titulluar “Michael Jackson: The Verdict”.
Dokumentari rikthen në vëmendje një nga çështjet më të komentuara në historinë e industrisë së argëtimit.
Në vitin 2003, Jackson u akuzua për disa raste të abuzimit seksual ndaj të miturve, duke shkaktuar një stuhi mediatike dhe një proces gjyqësor që mbajti vëmendjen e publikut për muaj të tërë.
Në projektin e ri të Netflix përfshihen persona që kanë qenë pjesë e procesit gjyqësor, mes tyre anëtarë të jurisë, dëshmitarë okularë, akuzues dhe mbrojtës të këngëtarit.
Megjithatë, shumë fansa të Michael Jackson kanë reaguar ashpër ndaj kohës së publikimit të dokumentarit, i cili vjen vetëm disa javë pas daljes së filmit biografik për jetën e artistit.
“Është e turpshme nga Netflix. Studio të tjera refuzuan filmin për Michael Jackson dhe tani po përpiqen të përfitojnë nga suksesi i tij”, shkroi një përdorues në rrjetet sociale.
Një tjetër shtoi: “Michael u shpall i pafajshëm. Kushdo që dëshiron të krijojë një mendim të drejtë duhet të lexojë dokumentet e gjykatës.”
Nga ana tjetër, regjisori Nick Green dhe producentja ekzekutive Fiona Stourton deklaruan se synimi i tyre ishte të sillnin një pasqyrë sa më objektive të procesit gjyqësor.
“Kanë kaluar 20 vite nga gjyqi ku Michael Jackson u shpall i pafajshëm, por debati vazhdon ende. Meqë kamerat nuk lejoheshin në sallën e gjyqit, publiku pa vetëm fragmente të asaj që ndodhi”, deklaruan ata.
