Kreu i grupit parlamentar të PD-së, Gazment Bardhi i ka kërkuar SPAK-ut t'i drejtohet pa vonesë Kuvendit me një kërkesë të re për heqjen e imunitetit të deputetes Belinda Balluku. Sipas Bardhit, ish-zëvendëskryeministrja është e pandehur për shkelje të barazisë në tendera dhe dyshohet gjithashtu për korrupsion dhe pastrim parash.
Në një reagim për raportin e Komisionit Europian mbi shtetin e së drejtës, Bardhi ndalet te pjesa ku shprehet shqetësimi për mbrojtjen që, sipas dokumentit, mazhoranca socialiste i dha Ballukut, duke refuzuar me votë kërkesën për ta vënë atë para drejtësisë. Sipas Bardhit, SPAK duhet të marrë në konsideratë shqetësimet e ngritura nga Brukseli dhe të veprojë menjëherë, duke paraqitur një kërkesë të re në Kuvend për heqjen e imunitetit të deputetes.
Reagimi i plotë i Bardhit:
Komisioni Europian, në raportin e publikuar dje, shprehet qartë se: “Refuzimi nga Parlamenti për të hequr imunitetin e një deputetjeje të Parlamentit ka ngritur shqetësime në lidhje me parimet e kontrollit dhe balancimit dhe të barazisë para ligjit. Në mars të vitit 2026, Parlamenti rrëzoi një kërkesë nga SPAK për të hequr imunitetin e një deputeteje të Parlamentit për akuzat për shkelje të barazisë në tendera. Ky refuzim ngriti shqetësime në lidhje me parimet e kontrollit dhe balancimit dhe të barazisë para ligjit.”
Por, ndërsa Komisioni Europian shpreh shqetësim për moslejimin e arrestimit, duke nënvizuar cenimin e parimit të barazisë para ligjit, të vetmit që nuk shfaqin shqetësim janë prokurorët e SPAK-ut, të cilët po bëhen pjesë e çimentimit të pandëshkueshmërisë në këtë rast.
SPAK-u, prej disa javësh, po zbaton dy standarde për Belinda Ballukun. Edhe pse vetë SPAK-u ka bërë publike se pozita e saj penale është rënduar me dyshimet për korrupsion pasiv dhe pastrim parash, nuk po zbaton standardin që vetë deklaroi gjashtë muaj më parë, sipas të cilit, kur rëndohet pozita penale, rëndohet edhe masa e sigurimit.
SPAK-u ka vetëm një rrugë për të mos u bërë pjesë e pandëshkueshmërisë që denoncon Brukseli në çështjen Balluku: të zbatojë ligjin, të aplikojë standardin që vetë ka vendosur gjashtë muaj më parë, t’i drejtohet pa vonesë Kuvendit me kërkesën për heqjen e imunitetit dhe arrestimin e Belinda Ballukut.
