Një prej personazheve më të komentuar të protestës së kaluar para Kuvendit u bë një shef policie, veçantërisht agresiv me sjelljen e tij, i filmuar teksa urdhëronte shoqërimin e protestuesve pa ndonjë shkak të dukshëm dhe ndërsa përdorte spray me piper ndaj qytetarëve paqësorë.
Në disa raste, ndërhyrja e policisë me urdhërat e tij abuzivë erdhi vetëm sepse protestuesit mbanin një megafon në dorë ose brohorisnin kundër deputetëve.
Më vonë, protestuesit e identifikuan efektivin si Ilir Hasrama, shef i komisariatit nr.1. Në fund të përplasjes, ai u godit me një vezë në sy nga një protestues i irrituar, një episod që u përhap me shpejtësi në rrjetet sociale, ku mijëra qytetarë dënuan veprimet e tij.
Por kjo sjelle i është kthyer në bumerang disa ditë më pas. Para Komisariatit nr. 1, ku dhjetëra qytetarë ishin mbledhur për të kërkuar lirimin e të arrestuarve, turma e shndërroi incidentin me Ilir Hasramën në slogan. (Video këtu)
Mes thirrjeve kundër arrestimeve, dëgjohej vazhdimisht në kor pyetja tallëse: “Si e ke synin?”, një thumbim i drejtpërdrejtë ndaj shefit të policisë që ishte kthyer në simbol të abuzimit të forcave të rendit ndaj qytetarëve.
Edhe këtë të hënë, policia arrestoi disa qytetarë gjatë protestës së së hënës para Parlamentit. Të ndaluarit pretendojnë se u shoqëruan pa asnjë arsye ligjore, vetëm sepse ishin ndër protestuesit më aktivë, mbanin megafonë ose organizonin thirrjet kundër politikanëve.
