12 persona kanë humbur jetën pasi një varkë që transportonte emigrantë u gjet në ujërat në jug të ishullit të Kretës, në Greqi. Ndërkohë, 18 persona të tjerë që ndodheshin në bord arritën të shpëtoheshin nga një anije mallrash me flamur maroken. Ngjarja u konfirmua të hënën në mëngjes nga Roja Bregdetare greke, e cila bëri të ditur se mjeti lundrues u lokalizua rreth 15 milje detare, ose 28 kilometra në jug të Kretës.
Deri më tani nuk janë bërë të ditura identitetet e 12 viktimave dhe as rrethanat e sakta që çuan në vdekjen e tyre. Ndërkohë, autoritetet kanë zbuluar edhe dy mjete të tjera lundruese në të njëjtën zonë. Në njërën prej tyre ndodheshin rreth 47 persona, ndërsa në tjetrën rreth 40.
Mjetet u lokalizuan nga agjencia evropiane e kufirit Frontex, përmes një avioni dhe një droni. Të gjithë personat në bord u shpëtuan dhe po transportohen drejt një porti në bregdetin jugor të Kretës. Greqia vijon të jetë një nga pikat kryesore të hyrjes në Bashkimin Evropian për emigrantët që largohen nga konfliktet dhe varfëria në Lindjen e Mesme, Afrikë dhe Azi.
Muajt e fundit, mijëra persona kanë tentuar kalimin e rrezikshëm detar nga brigjet e Afrikës së Veriut, kryesisht nga Libia drejt Kretës. Sipas Frontex, Mesdheu Lindor mbetet një nga korridoret më të frekuentuara të migracionit drejt Bashkimit Evropian. Gjatë nëntë muajve të parë të vitit 2026 janë regjistruar rreth 31.800 kalime të parregullta, 15% më pak krahasuar me të njëjtën periudhë të vitit të kaluar.
