Dy ministra të kabinetit qeveritar ndodhen në Francë për një vizitë zyrtare, në kuadër të lobimit që Shqipëria ka nisur për çështjen e hapjes së negociatave. Bëhet fjalë për Fatmir Xhafajn dhe Etilda Gjonajn. Gjatë vizitës së tij në Paris, ministri i Brendshëm Fatmir Xhafaj është takuar me homologun e tij Francës, Gerard Collomb, ku mësohet se është folur për bashkëpunimin në fushën e sigurisë, menaxhimin e kufijve dhe migracionit, por edhe për integrimin e Shqipërisë në BE.
Nga ana e tij, ministri Xhafaj shprehu vlerësim të veçantë për inkurajimin e autoriteteve më të larta franceze në këtë drejtim dhe veçanërisht për vlerësimet pozitive të bëra publike nga ministri Collomb.
Gjithashtu, të dy ministrat ndanë mendime rreth procesit të integrimit evropian të Shqipërisë, veçanërisht pas raportit të fundit të Komisionit Evropian i cili rekomandon hapjen e negociatave për anëtarësim në BE.
