Ariana Grande ka rikthyer debatet në rrjetet sociale pas publikimit të klipit të saj më të ri, “Petal”, i cili u publikua të premten dhe u komentua gjerësisht nga fansat për shkak të pamjes së këngëtares.
Në video, artistja shfaqet në një skenë audicioni, e veshur me një stil të frymëzuar nga filmi “Grease”: getat e zeza, një bluzë me supe jashtë dhe një shall të zi rreth qafës.
Pas publikimit të klipit, rrjetet sociale u mbushën me komente nga fansat, disa prej të cilëve shprehën shqetësim për peshën dhe gjendjen e saj fizike.
“Ajo është jashtëzakonisht e dobët dhe kjo është shqetësuese”, shkroi një përdorues, ndërsa një tjetër komentoi se “njerëzit kanë të drejtë të shqetësohen për shëndetin e saj”.
Megjithatë, shumë fansa të tjerë e mbrojtën këngëtaren, duke kërkuar që të ndalen komentet për trupin dhe pamjen e saj.
“Nëse do të kujdeseshit vërtet për të, nuk do të komentonit publikisht trupin e saj”, shkroi një përdorues në platformën X.
Kjo nuk është hera e parë që Ariana Grande përballet me spekulime për shëndetin e saj. Në një intervistë të vitit 2024, ajo foli hapur për presionin që gratë përjetojnë për t’u dukur gjithmonë perfekte dhe i quajti komentet për peshën dhe pamjen “të pakëndshme” dhe “të rrezikshme”.
“Ekziston një rehati që nuk duhet ta kemi për të komentuar trupin, fytyrën apo shëndetin e njerëzve të tjerë”, ishte shprehur ajo.
Në fund të vitit të kaluar, Grande ripostoi një pjesë të asaj interviste në Instagram, duke kujtuar ndjekësit se “është e vështirë të mbrohesh nga ajo zhurmë”.
Pavarësisht diskutimeve për pamjen e saj, “Petal” ka marrë vëmendje të madhe për konceptin artistik dhe realizimin vizual, ndërsa vetë këngëtarja vazhdon të fokusohet te muzika dhe projektet e saj të reja.
