Gabrielle Cheyenne, fansja që u bë virale pasi u largua nga skena gjatë koncertit të Usher në Nashville, ka reaguar pas komenteve të shumta në rrjetet sociale, duke sqaruar versionin e saj të ngjarjes.
Në një postim në Facebook, ajo tregoi se ekipi i Usher e kishte zhvendosur atë dhe nënën e saj, Tia Byrd, në zonën VIP përpara nisjes së koncertit dhe më pas e kishte ftuar të ngjitej në skenë.
“Para së gjithash, askush nuk refuzon të dalë në skenë. Dukesha fantastike. Mendoni se nuk do ta shfrytëzoja mundësinë që mijëra njerëz të më shihnin në ekranin gjigant?”, shkroi ajo.
Cheyenne shtoi se ajo dhe nëna e saj kishin bileta pranë skenës dhe se ishte vetë stafi i këngëtarit që i zgjodhi për t’i transferuar në zonën VIP.
Sipas saj, askush nuk i kishte shpjeguar paraprakisht se çfarë do të ndodhte në skenë.
“A prisnit të bëja gjithçka që donit ju? Nuk më thanë çfarë do të ndodhte,” u shpreh ajo, duke iu përgjigjur kritikëve në rrjet.
Më pas, përmes disa postimeve në Instagram Stories, Cheyenne këmbënguli se nuk kishte treguar mungesë respekti ndaj Usher.
“Nuk do të lejoj askënd të më ofendojë në internet dhe të presë që të rri e qetë. Nuk do të më frikësoni për një përvojë që ju vetë nuk e keni jetuar,” shkroi ajo.
Në një intervistë me balerinin Lance Savali, Cheyenne sqaroi se nuk ka asnjë konflikt me artistin.
“Nuk kam asgjë kundër tij. Thjesht dola në skenë,” tha ajo.
Ajo shtoi se gjatë momentit viral nuk e kishte vënë re reagimin e publikut, pasi e gjithë vëmendja e saj ishte tek Usher.
“Usher ishte përballë meje. Vetëm atë po shihja. Çdo gjë tjetër u zhduk,” tha ajo.
Edhe nëna e saj, Tia Byrd, reagoi në Facebook duke publikuar një fotografi të vajzës së saj me bashkëshorten e Usherit, Jennifer Goicoechea, pas koncertit.
“Gruaja e Usher dhe Gabrielle pas daljes në skenë. Ajo nuk është e mërzitur, ndaj pse jeni ju?”, shkroi Byrd.
Momenti u bë viral pasi Cheyenne u duk dukshëm në siklet ndërsa Usher i këndonte dhe përpiqej ta përfshinte në performancën e tij sensuale në skenë.
Në një moment, këngëtari pyeti publikun: “Mendoj se ajo nuk dëshiron të jetë në skenë, apo jo?”, përpara se t’i bënte shenjë stafit ta largonte nga skena.
Ngjarja u shoqërua me reagime të ndryshme në rrjetet sociale, ndërsa një pjesë e publikut në sallë e shoqëroi momentin me fishkëllima.
