Fituesi i Grammy-t dhe artisti i njohur Talay Riley është gjetur i vrarë me thikë në një pronë në lindje të Londrës, në Silvertown. Ai ishte 35 vjeç.
Sipas Policisë Metropolitane, Riley — emri i vërtetë i të cilit është Mark Orabiyi — u gjet të premten në mëngjes me plagë të shumta nga thika në kopshtin e një prone. Pavarësisht ndërhyrjes së shërbimeve emergjente, ai u shpall i vdekur në vendngjarje.
Autoritetet britanike kanë bërë të ditur se një burrë në të 20-at është dërguar në spital me plagë të rënda, por jashtë rrezikut për jetën. Ndërkohë, tre persona janë arrestuar në lidhje me ngjarjen, por më vonë janë liruar në pritje të hetimeve të mëtejshme.
Familja e artistit ka publikuar një deklaratë ku e përshkruan atë si “një djalë, vëlla dhe mik të dashur”, duke theksuar se ai “shpërndante dashuri, dritë dhe gëzim”.
“Do ta kujtojmë gjithmonë për mirësinë dhe shpirtin e tij të jashtëzakonshëm,” thuhet në deklaratë.
Edhe vëllai i tij ka ndarë një mesazh emocional në rrjetet sociale, duke e quajtur lajmin “të pabesueshëm dhe shkatërrues”.
Talay Riley ka punuar me disa nga emrat më të mëdhenj të muzikës botërore, përfshirë Britney Spears, Dua Lipa, Jessie J, Ellie Goulding, Chris Brown dhe të tjerë. Ai ka qenë bashkautor në projekte të suksesshme ndërkombëtare dhe ka fituar një Grammy për kontributin e tij në albumin e H.E.R.
