Jennifer Lopez ka shkaktuar debat në rrjetet sociale pas një deklarate në emisionin viral “SubwayTakes” të Kareem Rahma-s, ku ndau mendimin e saj për atë se kush mund të quhet një “New Yorker” i vërtetë.
Aktorja dhe këngëtarja e njohur, e cila aktualisht po promovon komedinë romantike të Netflix “Office Romance”, ku luan përkrah Brett Goldstein, u shpreh se vetëm ata që kanë lindur në një nga pesë lagjet (boroughs) e qytetit mund ta mbajnë këtë titull.
“Duhet të kesh lindur në New York për të qenë New Yorker. Të gjithë duan ta pretendojnë këtë qytet, por duhet të kesh lindur këtu. Duhet të kesh lindur në një nga pesë boroughs,” tha Lopez, e lindur në Bronx nga prindër me origjinë portorikane.
Moderatori Kareem Rahma tregoi se kur u shpërngul në New York në vitin 2012, banorët vendas i kishin thënë se pas 10 vitesh mund ta quante veten New Yorker. Megjithatë, Lopez nuk ndryshoi qëndrim.
“Unë nuk e kam firmosur atë peticion,” u përgjigj ajo me humor. Kur Rahma argumentoi se paguan taksa në New York dhe jeton prej vitesh aty, Lopez u tregua e prerë: “Kur lind në New York, atëherë je vërtet New Yorker. E thashë dhe e kam seriozisht.”
Deklarata e saj u bë menjëherë virale dhe ndau opinionin publik. Disa e mbështetën, mes tyre edhe aktorja Kerry Washington, e cila komentoi: “Jam 100% dakord.”
Nga ana tjetër, shumë përdorues të rrjeteve sociale e kritikuan këtë qëndrim, duke theksuar se New York është historikisht një qytet i ndërtuar nga emigrantët dhe i njohur për mikpritjen ndaj komuniteteve të ndryshme. Disa komentues e cilësuan deklaratën si përjashtuese, duke kujtuar se edhe figura të rëndësishme politike të qytetit kanë lindur jashtë SHBA-së.
