Nga France24/ Ish-presidenti i Kosovës, Hashim Thaçi, i dënuar me 25 vjet burg të mërkurën për krime lufte, është parë prej kohësh brenda vendit ballkanik si një hero guerilas dhe simbol i luftës së tij të përgjakshme për pavarësi.
Thaçi, i cili u shpall fajtor nga një gjykatë speciale në Hagë për krime lufte të kryera nga luftëtarë guerilas, duke përfshirë vrasje, arrestime dhe ndalime arbitrare, trajtim mizor dhe tortura, udhëhoqi Ushtrinë Çlirimtare të Kosovës (UÇK) pro-pavarësisë gjatë luftës së viteve 1998-1999 me Serbinë.
58-vjeçari - i cili shërbeu gjithashtu për më shumë se 7 vjet si kryeministër - pa popullaritetin e tij të rritej kur ndihmoi në organizimin e shpalljes së pavarësisë së Kosovës në vitin 2008.
Por imazhi i tij u njollos nga një raport i Këshillit të Evropës i vitit 2010 që pretendonte lidhje me krimin e organizuar dhe abuzime serioze të kryera gjatë dhe menjëherë pas luftës.
Kritikët akuzuan gjithashtu ish-udhëheqësin dhe partinë e tij për korrupsion dhe përqendrim të pushtetit midis aleatëve politikë.
Por ishin akuzat e kohës së luftës që i dhanë fund papritur presidencës së tij dhe e lanë të paraburgosur në Hagë.
Ai u padit në vitin 2020 për krime lufte dhe krime kundër njerëzimit, i akuzuar për përgjegjësi për vrasje, tortura, ndalim të paligjshëm dhe zhdukje me forcë gjatë dhe pas konfliktit.
“Këto nuk janë momente të lehta për mua dhe familjen time, dhe për ata që më kanë mbështetur dhe besuar tek unë në tre dekadat e fundit të luftës sonë për liri, pavarësi dhe ndërtim kombi", - tha ai në vitin 2020, kur njoftoi dorëheqjen dhe dorëzimin e tij në gjykatë.
Shumë njerëz e ndoqën vendimin drejtpërdrejt të mërkurën në një ekran në një shesh në kryeqytetin, Prishtinw, ku njw orë e numërimit mbrapsht kishte lajmwruar pritjen e vendimit për ditë të tëra.
Të shtunën, dhjetëra mijëra njerëz u mblodhën në Prishtinë për të kërkuar lirimin nga akuzat të Thaçit dhe ish-udhëheqësve të tjerë guerilas.
“Gjarpri”
I lindur në vitin 1968 në rajonin e Drenicës në Kosovën perëndimore - një vatër e rezistencës së shqiptarëve etnikë ndaj sundimit serb - Thaçi u përfshi në përpjekjet e rezistencës pasive kundër sundimit të Beogradit si student në vitet 1990.
Teksa studionte histori në Zvicër, shtëpi e një diaspore të madhe shqiptare, ai u frustrua nga politika e rezistencës paqësore të përqafuar nga presidenti i ndjerë i Kosovës, Ibrahim Rugova.
Me kthimin e tij në Kosovë, ai fitoi nofkën e luftës "Gjarpri" ndërsa ndihmoi në ndërtimin e një ushtrie guerile nëntokësore, UÇK-së, për të luftuar për pavarësi nga forcat e diktatorit serb, Slobodan Millosheviç.
Konflikti la rreth 13,000 të vdekur, kryesisht shqiptarë etnikë, dhe përfundoi pasi NATO ndërhyri në vitin 1999, duke i shtyrë forcat serbe të tërhiqeshin.
Gjykatat ndërkombëtare më vonë dënuan disa zyrtarë të lartë të ushtrisë dhe policisë serbe për krime të kryera gjatë konfliktit.
Teksa Kosova vazhdoi të shtynte përpara për shtetësi, Thaçi u bë një nga figurat e saj më të shquara politike.
Gjatë një vizite në Shtëpinë e Bardhë, Joe Biden, atëherë nënpresident i SHBA-së, e cilësoi atë si "George Washington i Kosovës".
“Krime lufte, kurrë”
Pas vdekjes së Rugovës, i cili konsiderohej gjerësisht si babai i kombit, Thaçi u bë kryeministër pas zgjedhjeve të vitit 2007.
Tre muaj më vonë, ai lexoi deklaratën e pavarësisë në parlament, duke njoftuar ndarjen e njëanshme të Kosovës nga Serbia - një veprim që Beogradi ende nuk e njeh.
Pavarësisht akuzave për korrupsion, ai mbeti në zemër të politikës dhe u zgjodh president në vitin 2016.
Ai gjithmonë ka mohuar çdo keqbërje gjatë luftës, duke e përshkruar atë si një rebelim “të drejtë” kundër represionit serb.
"Gabime politike në paqe mund të kisha bërë, por krime lufte, kurrë", tha ai në vitin 2020. ©LAPSI.al
