Autoritetet italiane kanë marrë në pyetje shqiptarin Eduart Xhani i akuzuar për vrasjen e nënës së tij, Meleqe Lusha, 39 vjeç, në shtëpinë e tyre në Chiari, në zonën e Brescias. Seanca e konfirmimit të masës së arrestit të 21-vjeçarit u zhvillua në spitalin psikiatrik të spitalit.
I riu u ekzaminua nga specialistët në orët pas krimit dhe këtë të enjte u mor në pyetje nga gjyqtari i gjykatës së Brescias. Para gjyqtarit, ai konfirmoi se kishte vrarë nënën e tij, siç u kishte thënë karabinierëve të martën në mbrëmje, duke shtuar se kishte tentuar edhe t’i jepte fund jetës së tij përpara se të kryente krimin, por pa sukses.
Një motiv që nuk ekziston
Përgjigjet që ai dha rreth arsyes pse e vrau nënën e tij ishin me sa duket konfuze dhe të paqarta, aq sa iu desh të transferohej në spital pas dërgimit në burg. Gjykatësi e ka rezervuar vendimin nëse do ta konfirmojë lënien në burg.
I riu punonte së fundmi kamerier në një “Burger King” në Rovato, fëmijë i vetëm, rrëmbeu një thikë rreth orës 9 të mbrëmjes, ndërsa ishte në kuzhinë me nënën e tij, dhe e goditi atë disa herë në fytyrë dhe gjoks, duke e vrarë. Me sa duket, ishte një shpërthim i papritur dhe i paprovokuar në një mbrëmje të zakonshme, pa debate apo tension të dukshëm.
Arratisja dhe më pas dorëzimi në kazermë
Pas vrasjes, i riu pa të dhëna penale, pa pasur kurrë probleme me ligjin, i përshkruar nga ata që e njohin si introvert dhe i heshtur u end për gati 10 orë me makinë midis provincave të Breshias dhe Kremonës, i veshur me rroba të njollosura me gjakun e nënës së tij të vrarë, në errësirën e natës dhe të vetes.
Më pas ai ndaloi makinën e tij Audi, të cilën po e ngiste me patentë të pezulluar, përpara kazermave të Karabinierëve në Kremona. Oficerit që hapi derën i rrëfeu: "Unë vrava nënën time në shtëpinë tonë.” ©LAPSI.al
