Imazhe të tmerrshme po qarkullojnë në internet të një aksidenti tragjik që u mori jetën 2 personave, të dielën në Aeroportin Ndërkombëtar “La Romana” në Santo Domingo , kur një avion privat Gulfstream u rrëzua teksta ekuipazhi i tij po përpiqej të ulej, duke vrarë pilotin dhe bashkëpilotin. Aeroplani ishte planifikuar të fluturonte për në Austin, Teksas, për të marrë legjendën e bejsbollit Yadier Molina dhe familjen e tij.
Një video që qarkullon në internet tregon avionin që po shkon drejt uljes dhe teksa rrotat janë ulur ai godet pistën me barkun dhe pjesën e pasme duke shpërthyer në flakë.
Pas rrëzimit, një tym i zi i dendur u ngrit mbi aeroport, ndërsa forcat zjarrfikëse nxituan në vendngjarje dhe u përpoqën të shuanin flakët që përfshinë rrënojat e avionit.
Aeroplani i regjistruar në SHBA thuhet se kishte mbërritur në Republikën Dominikane nga Porto Riko. Pasi u furnizua me karburant në aeroportin La Romana, ishte planifikuar të nisej me një fluturim çarter për në Austin të Teksasit, për të marrë Molinën, një ish-yll të Ligës së Madhe të Bejsbollit.
Molina, 43 vjeç, shprehu trishtimin e tij në një postim në Instagram.
"Ngushëllimet e mia për pilotët dhe familjet e tyre! Ky aeroplan po vinte për të më marrë mua, familjen time dhe miqtë e mi në Teksas për të na kthyer në Porto Riko", shkroi ai. "Është vërtet tronditëse. Falënderoj Zotin për gjithçka dhe jam thellësisht i trishtuar nga ajo që ndodhi", shtoi ai.
Sipas raporteve fillestare, vetëm pak minuta pas ngritjes, ekuipazhi raportoi një problem teknik, i cili e detyroi pilotin të provonte një kthim emergjent në aeroport. Të dhënat paraprake të gjurmimit të fluturimit tregojnë se avioni bëri rrotullime mbi zonën e aeroportit përpara se të përpiqej të ulej përsëri në pistë.
Megjithatë, gjatë fazës së fundit të procedurës, ai humbi stabilitetin dhe u rrëzua brenda perimetrit të aeroportit. Sipas raportit, avioni i përkiste një kompanie aviacioni biznesi dhe në kohën e aksidentit në bord ndodheshin vetëm dy anëtarët e ekuipazhit, të cilët u gjetën të vdekur në vendngjarje. Autoritetet ende nuk i kanë bërë të ditur identitetet e tyre. ©LAPSI.al
