Jensen Huang, CEO i Nvidia-s dhe një prej njerëzve më të fuqishëm në industrinë globale të teknologjisë, po përballet me një krizë personale dhe profesionale pas zbulimit të një lidhjeje jashtëmartesore me Alice Huang, një ish-drejtuese kompanie në Singapor, e dyshuar nga inteligjenca amerikane për lidhje me shërbimet kineze të spiunazhit.
Sipas raportimeve të New York Times, autoritetet amerikane kishin ngritur shqetësime për marrëdhënien e tyre, pasi Alice Huang ishte nën hetim për dyshime lidhur me transportimin e paligjshëm të procesorëve të avancuar të Nvidia-s drejt Kinës.
Huang pranoi publikisht tradhtinë bashkëshortore dhe kërkoi falje ndaj gruas dhe fëmijëve të tij. Ndërkohë, Nvidia ka nisur një hetim të brendshëm për të shqyrtuar rrethanat e çështjes.
Kompania ka deklaruar se nuk ka arsye të besojë se informacionet konfidenciale apo siguria kombëtare janë komprometuar.
Skandali ka ngritur pikëpyetje edhe për ndikimin e Huang në politikën amerikane ndaj Kinës, veçanërisht për shkak të marrëdhënieve të tij me presidentin Donald Trump dhe rëndësisë strategjike të teknologjisë së Nvidia-s në garën globale për inteligjencën artificiale.
Nga ana e tij, Trump deklaroi se bosi i Nvidias "s'ka bërë asgjë të keqe!"
Pavarësisht polemikave, bordi i kompanisë vijon të shprehë besim te drejtimi i tij. Megjithatë, çështja rrezikon të ndikojë në imazhin e një prej figurave më të fuqishme të Silicon Valley dhe në besimin ndaj kompanisë që është në qendër të revolucionit të inteligjencës artificiale.
