Një incident i paprecedentë ndodhi gjatë një mbledhjeje të këshillit bashkiak në New Jersey të SHBA-së, kur një kryetar bashkie humbi durimin dhe u sul drejt një qytetari që po e akuzonte. U desh ndërhyrja e të pranishmëve për të parandaluar përplasjen fizike.
Kryetari 59-vjeçar i Pemberton, Matthew Bianchini, pranoi se sjellja e tij ishte e papërshtatshme, por këmbënguli se kishte arsyet e tij dhe se, nëse do të ishte e nevojshme, do të bënte të njëjtën gjë përsëri.
"Ishte gabim? Absolutisht. A ishte e justifikuar? Absolutisht. Dhe do ta bëja përsëri nëse do të më duhej", - tha ai për mediat duke shtuar se tensioni kishte kohë që ishte rritur dhe se në një moment "thjesht shpërtheu".
Incidenti ndodhi të mërkurën, më 21 tetor 2026, gjatë një mbledhjeje të këshillit bashkiak. Sipas videos, banori Michael Socca reagoi ndaj komenteve që dyshohet se janë bërë nga gruaja dhe vajza e kryetarit të bashkisë, duke u përpjekur fillimisht t'i injorojë ato me gjeste dore.
Megjithatë, ai më pas ngriti gishtin e mesit drejt Bianchinit, duke provokuar reagimin e tij. Kryetari i bashkisë u hodh nga vendi i tij dhe u sul drejt qytetarit, duke bërtitur: “Do të të gjej dhe do të të... Do të të...!”
Duke folur për mediat, Bianchini u përpoq të justifikonte sjelljen e tij, ndërsa pranoi se e kaloi vijën. “Nuk duhej ta kisha thënë këtë. Ishte gabim. Ndodhi në nxehtësinë e momentit. Nuk do të lëndoj askënd”, tha ai.
Megjithatë, ai menjëherë e mbrojti reagimin e tij, duke pretenduar se banori në fjalë po e ngacmonte sistematikisht familjen e tij. “Mos e sulmo familjen time. Mendoj se çdo burrë i mirë dhe çdo baba i mirë do të kishte bërë pikërisht atë që bëra unë”, tha ai. ©LAPSI.al
