Modelja e njohur Cara Delevingne ka konfirmuar për herë të parë se ajo dhe aktorja Amber Heard kanë pasur një marrëdhënie romantike, duke hedhur dritë mbi thashethemet që qarkullojnë prej vitesh për lidhjen e tyre.
Në një intervistë në “Louis Theroux Podcast”, 33-vjeçarja u shpreh se ajo dhe Heard ishin “shumë të afërta për një kohë të gjatë” dhe se marrëdhënia e tyre u bë më e komplikuar gjatë periudhës kur Heard po kalonte divorcin nga aktori Johnny Depp.
“Ne ishim shumë të afërta për një kohë të gjatë. U bëmë më të përfshira në një moment kur ajo po kalonte divorcin,” tha Delevingne, duke përdorur termin “të ndërlidhura” për të përshkruar raportin e tyre.
Deklaratat e saj kanë rikthyer në vëmendje edhe zërat e mëparshëm për një lidhje të mundshme mes Delevingne, Heard dhe biznesmenit Elon Musk, të cilat u përfolën gjatë vitit 2020, por që Musk i ka mohuar kategorikisht, duke deklaruar se nuk ka pasur kurrë një marrëdhënie intime me modelen.
Heard dhe Delevingne njihen si mike që prej vitit 2014, ndërsa gjatë verës së vitit 2016 ato janë parë shpesh në publik së bashku, gjë që në atë kohë ndezi spekulime për natyrën e raportit të tyre.
Në intervista të mëparshme, Delevingne ka folur edhe për eksplorimin e seksualitetit të saj, duke thënë se marrëdhëniet me miqtë e kanë ndihmuar të kuptojë më mirë veten.
Ndërkohë, Amber Heard u martua me Johnny Depp në vitin 2015, ndërsa divorci i tyre u finalizua në vitin 2017, mes një beteje ligjore të bujshme që vazhdoi edhe në vitet në vijim.
