Partia Demokratike ka njoftuar se nuk do të marrë pjesë në mbledhjen e sotme të Konferencës së Kryetarëve, të parashikuar për në orën 08:30, ku ministri i Financave pritet të prezantojë projektbuxhetin e vitit 2027 dhe paketën fiskale. Sipas Grupit Parlamentar të PD-së, deri në mesnatë deputetëve nuk u ishte vënë në dispozicion as projektligji, as relacionet shpjeguese dhe as dokumentacioni financiar që shoqëron buxhetin. Demokratët argumentojnë se deputetët nuk mund të marrin pjesë në një diskutim për një dokument që nuk kanë pasur mundësi ta lexojnë dhe analizojnë më parë.
PD kundërshton gjithashtu mënyrën se si është thirrur mbledhja. Sipas saj, njoftimi është bërë vetëm një pasdite më parë, ndërsa Rregullorja e Kuvendit parashikon që Konferenca e Kryetarëve, si rregull, të zhvillohet jo më herët se 48 orë nga njoftimi. Në deklaratë, opozita thekson se nuk po refuzon diskutimin e buxhetit, por procedurën e ndjekur për shqyrtimin e tij.
PD kërkon që projektbuxheti dhe dokumentet shoqëruese t’u shpërndahen menjëherë deputetëve dhe që të përcaktohet një kalendar që lë kohë për analizë, pyetje, diskutime dhe amendamente.
“Kuvendi nuk është sallë konferencash e qeverisë dhe deputetët nuk janë publik i ftuar në prezantimet e ministrave”, thuhet në reagim.
Demokratët i bëjnë thirrje gjithashtu kryetarit të Kuvendit të garantojë respektimin e Rregullores dhe të drejtave të deputetëve.
