Ergys Agasi do të dalë sot para Gjykatës së Posaçme, ku pritet të rivlerësohet masa e sigurisë “arrest në burg”, e caktuar më herët ndaj tij në mungesë. Në GJKKO ka mbërritur fillimisht avokati i tij, Maks Haxhia, ndërsa seanca pritet të zhvillohet gjatë ditës.
Agasi u arrestua dy ditë më parë në zonën e Plepave në Durrës, pas disa muajsh në kërkim nga SPAK për dosjen e tenderëve të AKSHI-t. Ai u lokalizua fillimisht në Elbasan dhe u ndoq deri në Durrës.
Bashkë me të u arrestua edhe ish-efektivi i policisë Uljan Shpataraku. Pas operacionit, me urdhër të SPAK, u kontrollua edhe banesa e Shpatarakut pranë Liqenit të Thatë. Hetuesit kërkuan prova elektronike dhe dokumente që mund të lidhen me dosjen.
Sipas SPAK, Agasi dhe biznesmeni Ermal Beqiraj, i arrestuar më herët në Francë, dyshohen se ngritën një grup të strukturuar kriminal për të ndikuar tenderët publikë përmes korrupsionit, presioneve dhe dhunës.
Në të njëjtën dosje është nën hetim edhe ish-drejtoresha e AKSHI-t, Mirlinda Karçanaj, ndaj së cilës masa e sigurisë është zbutur në “detyrim paraqitje”.
