Harry Kane fitoi “Topin e Artë” 2026, duke lënë pas Kylian Mbappé dhe Lamine Yamal. Sulmuesi anglez i Bayern Munich pati mundësinë ta festonte këtë sukses në qytetin e tij, Londër, ku pas ceremonisë së ndarjes së çmimeve organizoi një festë me miqtë dhe familjarët. Kapiteni i kombëtares angleze festoi në një mbrëmje private në Cirque Le Soir, një klub nate ekskluziv me tematikë cirku në lagjen Soho, në Ganton Street, jo shumë larg vendit ku u zhvillua ceremonia. Bëhet fjalë për një nga lokalet më ekskluzive të Londrës, i cili organizoi një festë që vazhdoi deri në orët e para të mëngjesit. Kane u tregua i kujdesshëm dhe profesionist, duke konsumuar alkool me masë, përpara se të kthehej në Gjermani për stërvitjen me Bayern Munich.
Megjithatë, gjatë festimeve në lokalin londinez, disa video të publikuara në rrjetet sociale shkaktuan shqetësim. Në to shiheshin shtatë ose tetë shishe të mëdha shampanje Ace of Spades, me vlerë rreth 2.300 dollarë secila, të zbukuruara me flakadanë festivë dhe të transportuara mes turmës. Pamjet rikthyen në kujtesë tragjedinë e Crans-Montana-s në Zvicër, ku natën e ndërrimit të viteve humbën jetën 40 persona, mes tyre gjashtë të rinj italianë. Në atë rast, kontakti i flakadanëve me materialin shkumor akustik në tavan shkaktoi zjarrin. Për këtë arsye, pamjet e ngjashme në një tjetër lokal nate rihapën debatin publik mbi sigurinë në këto ambiente.
Harry Kane went straight to the club to celebrate his Ballon d’Or win… see the bottles they brought out for him 😂🔥 https://t.co/qGCMseCXNB
— Cleverly 💐 (@Cleverlydey4u) October 27, 2026
Në faqen zyrtare të Cirque Le Soir shfaqet përdorimi i shpeshtë i flakadanëve, të cilët në shumë raste afrohen shumë pranë tavanit. Megjithatë, në pamjet e publikuara nuk duket se tavani është i veshur me panele akustike të ngjashme me ato të lokalit në Crans-Montana. Ndoshta për këtë arsye, disa persona që komentuan videot në rrjetet sociale theksuan se gjithçka dukej se ishte zhvilluar në kushte të sigurta. Sidoqoftë, pamjet rikthyen në kujtesën kolektive tragjedinë e Crans-Montanas, e cila mbetet e pamundur për t'u harruar. “Na vjen keq, por pikërisht kështu nisi ajo tragjedi në Crans-Montana. Pse vazhdojnë të lejojnë ende këtë m*t?”, shkroi një përdorues në rrjetet sociale.
Sulmuesi anglez, megjithatë, vazhdoi të ruante profilin e tij profesional, duke balancuar festimet me disiplinën. Ai nuk dëshironte të rrezikonte një ditë kaq të rëndësishme dhe as të dëmtonte imazhin e tij, ndaj u përqendrua menjëherë te Bayern Munich dhe sfidat e ardhshme të skuadrës gjermane: të nesërmen në Kupën e Gjermanisë kundër Magdeburg, të shtunën në kampionat kundër Borussia Dortmund dhe tri ditë më vonë në transfertën e vështirë të Champions League në Madrid, kundër Atlético Madrid të drejtuar nga Diego Simeone.
