Të paktën tri kompani kineze kanë ndërprerë bashkëpunimin me Kylian Mbappé pas disa deklaratave të futbollistit francez, të cilat duket se i referoheshin Mao Ce Dunit, themeluesit të Kinës komuniste, të cilin e cilësoi si diktator. Prodhuesi i pijeve Dongpeng, grupi i produkteve të qumështit Mengniu dhe kompania e djathit Milkground kanë njoftuar përfundimin e marrëveshjeve me kapitenin e kombëtares franceze. Kompanitë deklaruan se kundërshtojnë “çdo fjalë ose sjellje që lëndon ndjenjat kombëtare”.
Vendimi erdhi pas shpërndarjes në rrjetet sociale të një videoje, në të cilën Mbappé, gjatë një interviste përpara pjesëmarrjes në emisionin francez online “The Bridge”, përmend një meme që paraqet një diktator kinez. Në video shfaqet më pas edhe një imazh i manipuluar i futbollistit, ku fytyra e tij është vendosur mbi atë të Mao Ce Dunit. Edhe platforma sociale RedNote njoftoi heqjen e materialeve promocionale që lidhen me lojtarin. Ndërkohë, në Weibo, hashtagët që lidhen me ndërprerjen e bashkëpunimeve dhe bojkotin ndaj Mbappé-s u bënë viralë. Përfaqësuesit e futbollistit nuk kanë bërë komente të menjëhershme.
