Kim Kardashian dhe Paris Hilton duket se janë sërish në qendër të spekulimeve për marrëdhënien e tyre, këtë herë për shkak të një libri që pritet të zbulojë më shumë rreth jetës dhe karrierës së yllit të “The Kardashians”.
Gazetari Jonathan Van Meter, autor i biografisë së re “Citizen Kim: The Woman Who Created the Future”, ka treguar se kishte tentuar të intervistonte Paris Hilton për librin, por takimi nuk u realizua pavarësisht përpjekjeve të përsëritura.
Sipas tij, Kim ishte përfshirë në organizimin e intervistës dhe fillimisht i kishte konfirmuar se Paris kishte pranuar të fliste. Megjithatë, më pas komunikimi duhej të kalonte përmes publicistes së Hilton.
Autori tregoi se kishte dërguar pyetjet dhe ishte koordinuar me asistenten e Parisit, por intervista ishte anuluar plot 17 herë gjatë një periudhe prej rreth katër muajsh.
Van Meter pranoi se, në një moment, anulimet e njëpasnjëshme iu dukën më interesante sesa përgjigjet që Paris mund të kishte dhënë gjatë intervistës.
Sipas rrëfimit të autorit për “The Hollywood Reporter”, Kim Kardashian nuk e kishte pritur mirë lajmin kur mësoi se intervista nuk po realizohej. Van Meter pretendoi se Kim ishte zemëruar dhe se situata dukej se kishte rikthyer disa pakënaqësi të vjetra mes dy ish-mikeve.
Megjithatë, kjo nuk do të thotë domosdoshmërisht se mes tyre ka nisur një konflikt i ri.
Një burim i cituar nga Page Six mohoi që Kim të ishte zemëruar me Parisin. Sipas këtij burimi, vështirësitë në organizimin e intervistës lidhen me axhendën e ngarkuar të Hilton dhe me faktin se koordinimi ishte lënë në dorë të një ish-asistenteje të kompanisë së saj.
I njëjti burim theksoi se të dyja vazhdojnë të mbështesin projektet e njëra-tjetrës dhe të ruajnë marrëdhënie të mira.
Nga asistente e Paris Hilton, në një nga yjet më të famshme të botës
Kim Kardashian dhe Paris Hilton u afruan në fillim të viteve 2000, kur Kim punonte si asistente dhe stiliste personale e Hilton, duke e ndihmuar edhe në organizimin e garderobës. Në atë periudhë, Paris ishte një nga personazhet më të komentuar të medias rozë, ndërsa Kim ende nuk e kishte arritur famën që gëzon sot.
Me kalimin e viteve, rrugët e tyre u ndanë, ndërsa Kim u shndërrua në një fenomen global përmes reality show-t “Keeping Up with the Kardashians” dhe ndërtoi një perandori biznesi në modë dhe bukuri.
Marrëdhënia e tyre pati edhe momente të vështira. Në vitin 2008, Paris bëri një koment fyes për pamjen e Kim-it, ndërsa një vit më vonë, kjo e fundit pranoi publikisht se ato nuk kishin komunikuar prej kohësh.
Në vitin 2014, Paris nuk ishte pjesë e dasmës së Kim Kardashian me Kanye West. Megjithatë, dyshja u afrua sërish në vitin 2016, ndërsa në vitin 2020 Hilton u bë pjesë e një fushate publicitare për markën SKIMS të Kim-it.
Kim, nga ana tjetër, mori pjesë në dasmën e Paris Hilton me Carter Reum në vitin 2021, duke treguar se raporti mes tyre ishte përmirësuar.
