Rihapja e Lotarisë Amerikane për vitin 2027 është bllokuar sërish, pasi Gjykata e Apelit e Qarkut të Nëntë në Shtetet e Bashkuara ka pezulluar përkohësisht zbatimin e vendimit të një gjykate më të ulët, e cila kishte urdhëruar administratën amerikane të hapte regjistrimet për programin e vizave të diversitetit. Vendimi, i marrë më 29 tetor, i jep mundësi administratës Trump të vijojë pezullimin e programit, ndërkohë që shqyrtohet ankimi i paraqitur ndaj vendimit të mëparshëm.
Megjithatë, Gjykata e Apelit nuk ka dhënë një vendim përfundimtar mbi të ardhmen e programit dhe as nuk ka konfirmuar ligjshmërinë e vendimit të Departamentit Amerikan të Shtetit për të mos hapur regjistrimet. Në arsyetimin e saj, gjykata vlerësoi se paditësi, studioja ligjore e imigracionit Red Eagle Law, nuk kishte një bazë të mjaftueshme ligjore për të kundërshtuar vendimin e autoriteteve amerikane.
Çështja nisi pas padisë së ngritur nga Red Eagle Law, e cila kërkoi ndërhyrjen e gjykatës për të detyruar Departamentin e Shtetit të hapte aplikimet për DV-2027. Më 14 tetor, gjyqtarja federale Jinsook Ohta kishte vendosur në favor të studios ligjore, duke urdhëruar autoritetet që të shpallnin periudhën e regjistrimit deri më 29 tetor dhe ta hapnin procesin më 1 nëntor.
Programi Diversity Visa, i njohur gjerësisht si Lotaria Amerikane, parashikon dhënien e deri në 55 mijë vizave të emigracionit çdo vit për shtetasit e vendeve me nivele historikisht të ulëta emigrimi drejt SHBA-së. Për momentin, regjistrimet për DV-2027 mbeten të mbyllura dhe nuk ka një datë të re zyrtare për hapjen e aplikimeve. Çështja pritet të vijojë në Gjykatën e Apelit, ndërsa mbetet e paqartë se kur do të merret një vendim përfundimtar dhe nëse programi do të rihapet për aplikantët.
