Prokuroria e Tiranës ka nisur hetimet për plagosjen e Erjon Vishkullit gjatë protestës së zhvilluar më 24 tetor në kryeqytet. Paralelisht, organi i akuzës po heton edhe dyshimet për përdorim joproporcional të forcës nga efektivët e Policisë së Shtetit ndaj protestuesve. Sipas njoftimit zyrtar, menjëherë pas ngjarjes së 24 tetorit, janë kryer një sërë veprimesh hetimore për të zbardhur rrethanat e plagosjes dhe për të dokumentuar ngjarjen në përputhje me ligjin.
Në kuadër të hetimeve, Prokuroria ka administruar pamjet filmike të vëna në dispozicion nga Banka e Shqipërisë, si dhe kartelën mjekësore të të dëmtuarit pranë Spitalit Universitar të Traumës. Gjithashtu, autoritetet po punojnë për përcaktimin e mënyrave të komunikimit me autoritetet italiane, me qëllim dërgimin e një letërporosie për vijimin e veprimeve hetimore.
Përveç rastit të Erjon Vishkullit, në të njëjtin procedim penal po hetohen edhe dëmtimet e disa qytetarëve të tjerë gjatë protestave studentore në Tiranë. Hetimet synojnë të verifikojnë nëse gjatë ndërhyrjeve policore është respektuar parimi i proporcionalitetit dhe nëse punonjës të Policisë së Shtetit kanë përdorur forcë përtej asaj që lejohet nga ligji. Deri më tani, Prokuroria ka administruar rreth 20 kartela mjekësore të qytetarëve të dëmtuar. Po ashtu, verifikimet për këto raste po vijojnë në bashkëpunim me Agjencinë e Mbikëqyrjes Policore (AMP).
