Kim Kardashian ka folur hapur për sfidat e bashkëprindërimit me ish-bashkëshortin Kanye West, duke zbuluar se pavarësisht ndarjes, vazhdon të shqetësohet për gjendjen e tij shëndetësore.
Në biografinë e re Citizen Kim, shkruar nga gazetari Jonathan Van Meter, ylli i reality show-t ka treguar se çrregullimi bipolar i reperit dhe episodet e tij kanë qenë një sfidë e vazhdueshme në jetën familjare.
“Shqetësohem për të gjatë gjithë ditës. Gjithmonë. Ai është babai i fëmijëve të mi dhe nuk do të ndalem kurrë së shqetësuari për të”, është shprehur Kim.
Ajo e cilësoi këtë si një barrë të madhe të të pasurit fëmijë me dikë me të cilin nuk ke domosdoshmërisht një marrëdhënie të mirë.
Kim zbuloi gjithashtu se për të ruajtur komunikimin me reperin, përpiqet të mbajë kontakte të drejtpërdrejta sa më të kufizuara, duke komunikuar shpesh përmes bashkëshortes së tij, Bianca Censori, ose menaxherit të tij.
Megjithatë, ajo tregoi se përpiqet të krijojë mundësi që e gjithë familja të kalojë kohë së bashku. Si shembull përmendi Krishtlindjet, kur kishte përfshirë edhe Bianca-n në organizimin e planeve, duke bërë të mundur që të gjithë të festonin së bashku.
Një tjetër vështirësi, sipas Kardashian, është fakti që Kanye nuk është gjithmonë i pranishëm në jetën e fëmijëve.
“Është sfiduese të bashkëprindërosh me dikë që vjen çdo disa muaj”, tha ajo, duke shtuar se përpiqet t’i mbrojë fëmijët nga kjo situatë, duke u thënë se babai i tyre është duke udhëtuar.
Ajo theksoi se dëshiron që North, Saint, Chicago dhe Psalm ta shohin gjithmonë të atin në mënyrën më të mirë të mundshme, pavarësisht vështirësive mes tyre.
Sa i përket episodeve të çrregullimit bipolar të Kanye-t, Kim tregoi se në disa raste fëmijët nuk ishin në dijeni të asaj që po ndodhte.
“Ky ishte një bekim i madh. Ai kalonte një episod të plotë dhe fëmijët nuk e kuptonin, sepse prania e tyre dukej se e qetësonte. Ishte një ekuilibër i vështirë: si t’i mbanim pranë tij apo kur duhej të ndërhynim?”, rrëfeu ajo.
Në fund, Kim pranoi se nuk është optimiste se gjendja e ish-bashkëshortit do të përmirësohet, megjithëse shpreson që kjo të ndodhë për hir të fëmijëve të tyre.
“Ai gjithmonë duket se arrin të ngrihet sërish pas vështirësive, por kjo më trishton shumë. Nuk mendoj se gjërat do të përmirësohen. Lutem që të ndodhë, për fëmijët e mi”, përfundoi ajo.
