Një Rally amatorial ka përfunduar me një masakër. Janë 10 personat që humbën jetën dhe nuk ndodhi nga ndonjë aksident rrugor. Pilotët u sulmuan nga një grup personash me armë zjarri. Ngjarja ka ndodhur në Meksikë në shtetin Baja California, vendi i shumë garave motorike, veçanërisht motoçiklistike, por edhe i tronditur rëndë nga frekuenca e vrasjeve. Nga janari deri në prill të këtij viti, 721 persona kanë humbur jetën në zonë, në mënyrë të dhunshme.
BILANC I RËNDË
Incidenti ndodhi në komunën Ensenada, një qytet me pamje nga Oqeani Paqësor rreth shtatëdhjetë kilometra nga kufiri me Shtetet e Bashkuara. Gara ishte me katërçikleta jashtë rrugës. Sipas një rikonstruksioni fillestar nga policia, pak pas orës 14:00 me orën lokale, pilotët u ndaluan në anë të autostradës Transpeninsular, në km 90, në një zonë me dyqane. Pikërisht aty një grup njerëzish zbritën nga një Suv me ngjyrë të errët dhe qëlluan, madje me armë të gjata, duke shkaktuar "nëntë të plagosur dhe 10 të vdekur", shpjeguan autoritetet e Ensenada në një deklaratë.
Një video e shkurtër, e postuar më vonë në rrjetet sociale, e marrë nga një influencues që po merrte pjesë në Rally, tregoi dy burra të armatosur duke zbritur nga automjeti sportiv me fytyrat e mbuluara me kapuç. Ata qëlluan mbi katërçikletat dhe në video dëgjohen të shtëna të shumta armësh dhe britmat e të pranishmëve. Video të tjera nga përdorues të ndryshëm, gjithmonë të shpërndara, tregojnë kufomat e njerëzve në tokë pranë automjeteve të vogla fuoristrade. Prokurori i Baja California, shteti i së cilës është prekur nga dhuna e lidhur me kartelet e drogës, ka njoftuar ngritjen e "një grupi të posaçëm hetimor" për të identifikuar përgjegjësit e masakrës.
